رغم مخالفتها لشروط الجايزه ولكن ستفوز ؟؟؟؟؟؟

[بسمه2002]

ايامنا والليالي كم نعاتبها
.....................شبنا وشابت وعفنا بعض الاحوالي
تاعد مواعيدٍ والجاهل مكذبها
.....................واللي عرف حدها من همها سالي
ان اقبلت يوم ماتصفى مشاربها
......................تقفي وتقبل وما دامت على حالي
في كل يوم تورينا عجايبها
......................واليوم الاول تراه احسن من التالي
ايام في غلبها وايام نغلبها
......................وايام فيها سوى والدهر ميالي
جربت الايام ومثلي من يجربها
......................تجريب عاقل ذاق المر والحالي
نضحك مع الناس والدنيا نلاعبها
......................نمشي مع الفي طوع حيث ما مالي
كم من علوم وكم من آداب نكسبها
......................والشعر مازون مثقالٍ بمثقالي
اعرف احروف الهجا بالرمز واكتبها
......................عاقل ومجنون حاوي كل الاشكالي
لاشك حظي ردي والروح متعبها
......................مافادني حسن تأديبي مع امثالي
ان جيت ابي حاجه عزت مطالبها
......................العفو محدٍ مع المخلوق بيسالي
قومٍ الي جيتها صكت حواجبها
.....................وابدت لي البغض في مقفاي واقبالي
وقومٍ الي جيتها رفت شواربها
.....................بالضحك وقلوبها فيها الردى الجالي
ماكني الا مسوي حال مغضبها
.....................والكل في عشرتي ماكر ودجالي
الجار جافي وكم قومٍ نحاربها
.....................والأهل واصحابنا والدون والعالي
والروح وش عذرها في ترك واجبها
......................راح الحسب والنسب في جمع الاموالي
نفسي تبي العز والحاجات تغصبها
......................وترمي بها بين أجاويد وانذالي
عفت المنازل وروحي يوم اجنبها
......................منها غنيمه وعنها البعد اولالي
لاخير في ديره يشقى العزيز ابها
......................يمشي مع الناس في هم واذلالي
دارٍ بها الخوف دايم ما يغايبها
......................والجوع فيها معه من بعض الاحوالي
جوعاً سرا حينها شباع ثعالبها
......................ال*** والهر يقدم على كل سربالي
عز الفتى راس ماله من مكاسبها
.....................يامرتضي الهون لاعزٍ ولامالي
والناس اجانيب لين انك تصاحبها
.....................تكون منهم كما قالوا بالامثالي
الأرض لله نمشي في مناكبها
.....................والله قدر لنا ارزاق وآجالي
حث المطايا وشرقها وغربها
.....................واقطع بها كل فج دارس خالي
واطعن انحور الفيافي مع ترايبها
.....................وابعد عن الهم تمسي خالي البالي
لو مت في ديرةٍ قفر جوانبها
.....................فيها لمواطي السباع الغبس مدهالي
أخيرمن ديرةٍ يجفاك صاحبها
.....................كم ذا الجفا والتجالي والتملمالي
دوس المخاطر ولا تخشى عواقبها
......................الموت واحد ولا عند القدر جالي
ترى المنيه إذا مست مخالبها
......................تدركك لو كنت في جو السما العالي
والشمس في برجها والغيم يحجبها
......................تقبل وتقفي لها في الفلك مجدالي
رب السموات يامحصي كواكبها
......................يامجري السفن في لجات الأهوالي
ضاقت بنا الأرض واشتبت شبايبها
.......................والغيث محبوس يامعبود ياوالي
يا الله من مزنةٍ هبت هبايبها
.......................رعادها بات له في البحر زلزالي
ريح العوالي من المنشا تجاذبها
......................جذب الدلي من جال مطوية الجالي
ديومه سبلت وارخت ذوايبها
.......................وانهل منها غزير الوبل همالي
تسقي ديارٍ عزيز الوقت حاربها
........................ماعاد فيها لبعض الناس منزالي
وازكى صلاة على المختار توحي بها
.......................شفيعنا يوم الحشر فيه الاهوالي
( بديوي) متى بتسلموني الجايزه؟؟؟؟؟:cool:

[سايق الخير]

بصراحة قصيدة تستاهل الجايزه ولو الأمر يرجع لي كان على طول بدون تفكير بس المشكلة اني اللي متشرط :p وما شاء الله ثاني مشاركة وكلها افضل من الأخرى وياساتر ينخاف من موق وبسمة وخصوصاً على الأجنحة;) .
نتمنى ان نرى روائعك يابسمه ولا تقاطعيننا.تحياتي

[ابن الوادي]

-------------- بسم الله الرحمن الرحيم--------------

يقول المثل اذا خصمك القاضي فمن تقاضي!

اشوف الدعوى مطبوخه , لا والموضوع مثبت بعد يعني رحنا فيها

بس زي ما يقولون الواسطه فوق القانون , موضوع بدون قصه ولا حتى اسم الشاعر !

لكن عاد الله ثم ابو محمد , الاخت بسمه تراني امزح والقصيده رائعه بكل المقاييس وياليت تشوفين الموضوع السابق لي وتحكمين بنفسك

http://najran.biz/vb/showthread.php?threadid=518

[عابرة سبيل]

ايش اقول وايش اعلق؟؟؟
والله روووعه بمنتهى الكلمه
كل ماقلت هالبيت حلو عجزت وشفت البيت الثانى احلى..
كلها حكم وكلها واقع وكلها فوائد..
روحى ياشيخه..والله امتعتينا بهالقصيده..
قريتها الى الان 3 مرات قبل مااكتب تعليقى هذا.
وياليت نعرف من هالشاعر
تسلمين يابسمه..

[بدوي]

قصيده اكثر من رائعه يابسمه تسلمين عليها اطربتينا بها واسمحوا لي بترشيح القصيده للدخول للمربع الذهبي:D

عابرة سبيل نيابة عن بسمه اللي قال القصيده هو الشاعر : بديوي الوفداني العتيبي

بالله يابسمه اذا كان عندك قصائد اخرى لنفس الشاعر فلا تحرمينا منها .



==================================
عفوا بسمه فيه بعض الابيات وجدتها ناقصه في القصيده واحببت اضافتها هنا لرغبتي بكتمال عقد هذه القصيده.

المـال يحي رجال لا حياة بهـــا
------------------كا السيل يحيي الهشيم الدمم البـالي
ماقرت الاسود في عالي مراقبها
------------------تسعى على الرزق ماحنت للاشبالي




بدوي ((امـــــــور))

[الفيصل]

والله قصيده تستاهل الجايزه وفعلاً اشوف ان اقل شيئ ممكن يسويه سايق الخير هو ان يثبت هذه الرائعه وانا اعلن ترشيحي لها بالدخول في المربع مع البدوي .وننتظر الجديد.

[سايق الخير]

فعلاً الواسطه فوق القانون وقصيدتك جميله جداً جداً بس ما عندك واسطه ايش تبغانا نسوي ;) .
صدقني ان قصيدتك نزلت أيام انا كنت مشغول فيها ولا فضيت لشيئ بس ابشر بالعوض وانا اخوك.تحياتي.

[بسمه2002]

الأخ/ابن الوادي
ولا يكون خاطرك الا طيب تراني ارسلت لسايق الخير يفكها من التثبيت علشان خاطرك.
اما بالنسبة لموضوعك فهو رائع جداً ولا بد ان يكون مثبت.
الأخ/سايق الخير
فعلاً مشرف في المكان المناسب تعامل رائع واسلوب مثقف.
الأخ/ابوعلي
منتدانا هذا بيت لنا ومشرفيه اخوانن ايضاً وما يستاهلون انك تجرح مشاعرهم.
تحياتي لك على ما ابديته من رضا على اموضوع.
اختي/عابرة سبيل
هذا من ذوقك والأصل الذي تنبعين منه واشكرك من اعماق قلبي على ردك الرائع .
اما بالنسبة للشاعر فقد ذكرته بلأسم في نهاية القصيدة على أساس ان القصيدة معروفه وكمل المعلومات (بدوي).
الأخ/بدوي
لا تكون مفكر اني ادلعك واقول (بديوي)تراه عتيبي للمعلومية:cool: .
تسلم لي على إطرائك للمشاركة وترشيخها للمربع الذهبي (الله يسمع منك).
واشكرك على التعريف بالشاعر وإضافة الأبيات .اما بالنسبة لقصائده فسأجتهد لإرضائكم.
الأخ/الفيصل
اشكرك على ما أبديته من تفاعل مع مشاركتي وعلى ترشيحك لها والله لا يحرمنا منك ومن سايق الخير والاعضاء.

[بدوي]

بسمه : ياشين التميلاح بس .... :D

من اللي قال انك قلتي بديوي عليشان تدلعيني ؟؟ راجعي ردي اللي فوق وتلاحظين اني ذكرت اسم الشاعر قبل ما تذكرينه :)

وللمعلوميه ترى البيت :
والشمس في برجها والغيم يحجبها
......................تقبل وتقفي لها في الفلك مجدالي

ترتيبه الصح يكون قبل الأخير .... للتدقيق أكثر

بس انا على ترشيحي لأنها قصيده منتازه و تعد من احسن القصايد اللي سمعتها :)
و تسملين عليها جدا :)

بديوي لوووووووووووووووووووووووووووووووووووووووووول :D

امـــــــــور

[دحباش]

اش ابداع شوي ..... الا والله الابداع يقول .. انا بري .... تستاهل اكثر مني :)

بسمه .... انا لي هنيا سنه في المنتدى ( لا تدققون ) احسن قصيده قريتها في المنتدى ذا .. و اختيار في الصميم و تعجبني الثقه ... و من ذلحين اقولك ترشيحي لذي القصيده ... و ماعلي اذا كانت مخالفه للشروط و خل سايق الخير يقول شي :)

اطربينا على شاكلة القصيده ذي :)

[لا يا شيخ]

فوق لا بارك الله في تحت ....... مشكورة يا بسمة وعز الله ان عاد به قصايد قديمية :)