العجـــــــب العجـــــــاب

[قلب الأسد]

بسم الله الرحمن الرحيم
شوفوا حبيت أخربط معكم وأتنفس شوي ( فلا حد يهلكني مناقيد وخصم )
وشوفوا وش أنا جايب لكم .......... :-


اليوم : السبت
الموافق : ماادري وش يوافق من زين هالذاكرة كل اللي اعرفه انه في شوال في سنة 1992م
المكان : السكن الجامعي في جامعة الملك عبدالعزيز خبركم مابعد حطوا جامعة في (سقام ) إلى هالحين ( حدنا المعهد االصناعي وعليه خبط وفقش علشان المكافأة ) . :D
الحالة الاجنماعية : ابلغ من العمر سبع وعشرون عام واعزب وطفران ومغترب وفي الصيف اكد على جمس خربان مكيفه اجيب ردود حبحب من المزارع ( يعني اني كديد)
القصة :
رنت الساعة اللي حاطها جنب فراشي على الساعة سبع زي العادة علشان اروح الجامعة ( عندي واحدة اصلية ماقد خربت مع اني قبلي امحط بها كل ماهبلتني ..كان تعرفونها ماركة بق بن شاريها من سوق السوريين ، ماتقومك انت لحالك وبس تقوم كل طلاب السكن )
طبعاً فزيت من فراشي وأنا متردد هو أنا ماخذ لي غطيطة زود ربع ساعة !
قم بس وادحر الشيطان .. طيب
واقوم واروح للحمام اغسل وجهي من آثار النوم وغبار الاحلام وافرك لوحتي الامامية بالموية والصابون ( صابوني المفضل ابوديك ) لعل وعسى إني اطلع ابيض شوي ( طول عمري افرك في هالوجه ولاقد جاب نتيجة ) وفيما انا واثناء انهماكي في عملية الصنفرة سرحت بالذهن مبحر في خيال بعيد وصرت افكر بصوت مسموع عن شكلي اللي مهوب من زينه دب ولاهنا زود طول وكرشتي بادية في البروز وشعري (قزيز) اللي يالله اقوى أمشطه (أكده) :D
مسحت وجهي بالمنشفة ثم القيت نظرة على طلعتي البهية في المراية اللي توي شاريها من الحراج البارح عقب مانكسرت الاوله ( من عادتي اني اطالع في المراية كل يوم واقول : ياملحي ويازيني ) (أطخم) :D
لكن كأن اللي في المراية مهوب يشبه لي ياجماعة !!
اشوف واحد اطخم ومزيون شعر ناعم كانه اللي يجي في دعايات برت بلص والوجه صار ابيض عقب الحنطي والعيون زرق والكرشة راحت وصرت اطول شوي وممشوق القوام .
معقولة ان الصابونة ( ام ديك) جابت نتيجة !
مهوب معقولة اني بهالزين كله لحد اني يوم شفتني فكيت ثمي :o !!!!
صرت أشبح في وجهي بالمراية واقول : انا / مهوب انا / انا / مهوب انا / ..
لا والله مهوب انا !!
قلت لهاالشخص الماثل امامي في المرآة : من انت
قال لي : انا انت ياوجه العنز !
قلت : وشلون
قال : ماودك ان شكلك يصير زين
انت قدام المراية السحرية كل اللي تبيه ينفذ لك بس بشروط !
اصابتني رهبة مصحوبة بدهشة وانبساط شعور غريب يصعب وصفه !!
وقلت بعد ان افقت من الصدمة : وش هي الشروط
1- تكون لحالك .
2- تقول اللي تبي بصوت مسموع.
3- بين كل طلب وطلب فترة لاتقل عن اسبوع .
4- الطلبات الكبيرة تبي لها فترة طويلة علشان تطلب ثانية .
5- احقق لك الطلبات المعنوية وبعض الماديات وفلوس كاش مافيه .
6- تحفظني في مكان آمن .
7- وان رحت لغيرك ماعاد ارجع لك .
ياسلااااااااااااااااااااااااااااااااام
كل اللي ابيه اقدر احققه .

وش اللي يمكن اطلبه جا في البال اشياء كثيرة مااقدر احصيها وهذا بعض اللي جا في هالراس :
الليلة :
فيه عرس لواحد من الجماعة ودي اغير شكلي لمدة ست ساعات لشكل بزر وادخل قصر الافراح واقز الحريم والبنات تراي ماقد شفتهم من عمري ثمان وقبل واحد من الشيبان يطلعنا ويمحطنا بالعصا اللي معه .

بكرة الصبح :
ودي اغير شكلي ويصير مثل شكل مدير الجامعة واستهبل على هالدكاترة واحوس مريرهم زي مايسوون بنا واخذ حقي منهم وافي ( اه .. ياسلام قاعد افرك يدي )

ودي اصير مايك تايسون :
إذا توظفت اروح لمديرنا وأنا امضغ شيء في ثمي واذا سألني وش تاكل اقول هذي اذن واحد قابلته في السيب مااعجبني شكله قاعد امزمز عليها واسأله عني ، علشان يخاف مني ولاعاد يسأل عني رحت والا جيت !
ترى اللي يضايقه ( أنا قلب الأسد ) يضايقني ( انا يامايك تايسون ) وانا طالع ارجع من عند الباب والتفت عليه وان باحر بعيوني واقول هه تقول شيء اتهدد ودي يعابط معي علشان اساويه هو وكرسيه بالارض .

اتمنى اصير لاعب كرة قدم :
لو ساعة اجيب هدف واسوي حركة السباحة اجيك وأزحف من اخر الملعب على بطني قد سويتها مرة في صالة بيتنا ويصك راسي في عتبة الباب وودوني اهلي لماقان واربع غرز !! ((نفسه الحسن اليامي يسويها) خخخخخخ

ودي اصير قطوة :
بس موب أي قطوة ابي قطوة (( جندي ولا عري )) بكبر الدريشة علشان اصيد فار ملعون والدين قاهرني نازل معي في الغرفة ولا هو يعطي قطته مع الرجاجيل ولاعب (ن) في ثيابي لعب آآآآآآآآآآه .

ودي أصير غطا قدر :
علشان اشوف العمليات الميتافيزيقية للرز وهو ينشف

ودي اصير حفرة :

وياليتها تكون متنقلة وين مايروح (هنا وايلي) …. ( ولد جيراننا اللي في رير - احد الاحياء الراقيه بمنطقة نجران تشبه العليا في الرياض - قاهرني من كثر مايعلق علي ويسطرني بيديه اللي تقول الوحدة منها مرزبه ) اصير قدامه بشكل مفاجيء ماله مفر الا يطيح فيها ( الله من النجاسة .. بس يستاهل قبله يسميني التنكه

ودي اصير قوطي تونة ( بشرط ماتكون تايلندية ) :
علشان تشتريني احد المدرسات واشوفهم وهم يفطرون ويحشون في خلق الله .

ودي اصير بكلة :
عند كوافيره كل شوي على راس بنت غير شكل بس خوفتي اني اجي على راس سودانية وانشب في عرادتها ثمن من يطلعني من شعرها !

ودي اصير اشياء كثيرة تدور في بالي ودي اسويها بس قررت اني ابدي الاشياء المهمة اول شيء طلبت اني اخلص الجامعة وتحقق لي هالطلب بسرعة وبتقدير امتياز بس اخلاء الطرف كأنه تأخر شوي !!

ثاني شيء طلبت من المراية انها تدور لي على وظيفة محترمة ومرت فترة طويلة ولا صار شيء وارجع اسألها ثانية واعتذرت مني وقالت : اسمح لي هذي صعبة والديوان مانزل وظائف من زمان ... وشوري عليك تدور لك على (واو) هو اللي يمكن ينفعك !!!

المهم اني اموري مشت وتوظفت عقب ماشاب شق من راسي ( ذي بسيطة نرجع السواد للشعر بطلة على المراية ) واعرست على محبوبة قلبي وجبت منها ثلاثة كناري ( مشكلتهم انهم يغردون 24 ساعة )

وكان من ضمن الطلبات المهمة اني اسجل في ساحة الاقلاع لاني يوم جيت اسجل فيها لقيته مقفل والعالم طوابير في الانتظار والحمدلله انه تحقق لي وافتكيت من المرابط في سجل الزوار ( المرة الجاية باطلب من المراية تسجيل هالمساكين اللي في سجل الزوار كلهم عن بكرة ابيهم يستاهلون والله ) .

صار لي هالحين 8 سنين على هالحالة وانا مستانس بها المراية ومحافظ عليها اكثر من عيوني !

في يوم من الايام :
لقت نفسي فاتح باب سيارة (مهيب سيارتي ) لكن هو امداني افكر مادريت الا شيء يجرني من داخل ويجلسني على مقعد السائق وربطني بحزام الآمان ومالقيت دريكسون هه سيارة بدون دريكسون ؟؟؟؟ ويجيني صوت يقول لي : اهلين قلب الأسد ( وش شكلها سيارة عصرية – مهيب هايلكس – وذا اللي يحاكيني الكمبيوتر ) وكمل : وين رايح قلت : للبيت ويدعس بي مع هالشوارع والحواري الين قربت للبيت وخابر فيه مطب عقبه حفرة فيها نقعة موية قبلي دايم اطيح فيها !!
لكن كلنا المطب زي العادة ( اصلاً ادمنت عليه لو مااكل هالمطب احس ان شيء ناقصني )
وصلت للبيت وانوار البيت مدهرة مادريت الا انا في وسط بيتي والعالم تخترش من حولي وش اللي قاعد يصير
والعالم تدخل وتبارك لي وانا متنح ماادري عن شيء !
بيتي مليان ناس ويقولون متى نمشي !
هو انا ماسكهم ورا مايمشون !
أنا .. خابر الضيف اذا جاء يمشي يقول كرمكم الله ويقضب الباب وراهم يشاوروني يبوني الزم عليهم … منيب فاضي لاحد !! أنا لاهي في همي !!
انا هالحين ودي استوعب الموقف اللي انا فيه وشو بالضبط شكل الدعوى فيها عرس !! لايصير عرسي ! وأنا ماادري بس !
بس أنا توي حرمتي محاكيتني بالتليفون ومبسوطة معقوله لو أنه عرسي تكون مستانسة لها الدرجة !!
ياجماعة تراي ضايع دبروني !
وفي هالاثناء يدخل علي شاب في قمة أناقته رف قلبي له يوم دخل وسلم علي وحب راسي
وقال (يابه) نمشي
رن جواله وماانتظر ردي مشى وخلاني ادق الهواجيس !!
(يابه) !!
دارت بي الدنيا ولفت واجلس على الكرسي وسط الصالة واشوف قدامي لوحة فيها صورة لهذا الشاب وعليه ملابس ضابط توه متخرج من الكلية الامنية !
من هو ذا ماعندي من العيال الا (محمد) وعمره 5 سنين وفسفوسي وعمره ثلاث وبنتي الفسيفساء وعمرها سبع ( ماشي على وزنية مضبوطة !! ) !

وفي هاللحظة تدخل الصالة علي بنت شمحوطة وماسكة ولد صغير في يدها واصد عنها لين تغطى لكنها واصلت سيرها تجاهي وتقبلني مع وجنتي وتقول للولد معها سلم على جدك يابعد طوايفي !!
انا مابعد افقت من الصدمة الاولى تجيني اللي العن منها وتنذح بالولد على رجلي وراحت تركض كأنها ناسية شيء !!

حالة الذهول تزداد عندي وهممت بالذهاب الى الحمام وفي طريقي صادفتني ام محمد ورا شكلها متغير كنها شانت شوي ( لا والله اكثر من شوي ) وش هالعرافيط اللي في وجهها ماقدر المكياج يخفيها !! وش هالتغير السريع ورا الحريم يعجزن بسرعة من يوم تبنط لها بولدين وهي متغيره !
أمور عجيبة تدور من حولي ماقدرت استوعبها ورحت وغسلت وجهي واقول انا شكلي في حلم مسحت بالفوطة واناظر روحي في المراية والا شكلي متغير الشيب غازيني في كل مكان والعرافيط ماليتن الوجه
رجعت للصالة ولقيت جريدة منطولة على الطاولة والقطها بشوف تاريخها والاه مكتوب في يوم الاثنين 2/2/2022 م.
وفي صدر الصفحة الأولى مكتوب بالبنط العريض الليلة حفل اعتزال عميد لاعبي العالم احمد الدوخي !!! خخخخخخخ

2022م اخر علمي ان امس 7/7/2000م
وين راحت هالعشرين سنة من عمري .. وين !

رحت اركض ادور مرايتي السحرية اللي دايم اوزيها في التجوري ( اخفيها في الخزانة ) والله ولا ألقاها واستبد بي الغضب وبحثت عنها في كل مكان ولكن اخر مااتذكره امس أن ولدي محمد داخل علي الغرفة وانا نايم وشغل التلفزيون على قناة السبيس تون وازعجني واقلق منامي وقمت وجريته مع شوشته وطلعته برا وزعل وقال : قبلكم مدلعين اخواني ولا تطقون الا انا متى اكبر وافتك من غثاكم !! وكانت كل امنياته انه يصير ضابط !!
وجت أم محمد ومعها الولد يشاهق وقالت : وراك على الولد تبي تعقده المهم اني رحمته وخليته في الغرفة لحاله وطلعت مهيب من عادتي اطلع بدون مااشيك على المراية !!
اوه .. اول مرة انسى التجوري ( الخزنة ) حقتي مفتوحه وفيها مرايتي السحرية !
ادركت بعد فوات الآوان ان المراية حققت طلب ولدي الله يهديه وهذا اليوم صار يوم عرسه ………
الله يهديك ياوليدي مابعد امداني اتهنا بشبابي وقعدت اندب حظي وعلى اليوم اللي لقيت فيه هالمراية !

--------------
اقول ورا ماتتخيلون انكم لقيتوا هالمراية وفي نفس الواحد او الواحدة منكم شيء وده انه يسويه وش بتسوون:confused: