الشاعر بدر الحزين

[سعيدان]

اخواني الاعزاء السلام عليكم ورحمة الله وبركاته
الشاعر بدر الحزين هو احد اروع مبدعي الشعر في منطقتنا الحبيبه
وعندما شاهدت ان اغلبية شعار المنطقه موجودين هنا احببت ان اشارك هنا بنشر قصائد الشاعر الكبير بدر الحزين وحقيقة انا لا اعلم ان كان هذا الشاعر قد اصدر ديوان ام لا ولكن املك الكثير من قصائده وسوف انشر اليوم احدى هذه القصائد وسانتظر رد المشرفين ان كانوا سيسمحون لي بنشر باقي القصائد في نفس هذا الموضوع لكي تكون مرجع لكل عاشق لقصائد بدر الحزين

في البدايه احب ان اشير الى اسم الشاعر الحقيقي وهو مانع صالح جلاب ال غانم اليامي

قصيدة ,,,,, دريتي ليه يا نجوى؟

قبل ما يحرق الساحر بخوره في زوايا الغار ,,,, قبل ما ياخذ العراف يديك وتلمس اكفوفه
قبل ما يمسح الكاهن قدمك وياخذك مشوار ,,,, تعال اعطيك تعويذه كتبها الحب بحروفه
تعال اعطيك حرز الحب حبيبي يبعد الاشرار ,,,, تعال اهدي طفل صدرك زهر والحان معزوفه
وقفت وقلت مشكوره ويكفيني الشعر تذكار ,,,, فمان الله يا نجوى واعذري القلب وظروفه
انا كم قلت لك قلبي بكفين الهوا طيار ,,,, يخاف القيد وان كانه حنان بروح ملهوفه
مهاجر دايم بطبعي ولا اعرف لعبة الاقدار ,,,, ويا كم تهت في صحراء حملها الموت بكتوفه
بيوم اغنى من الحاكم من السلطان والتجار ,,,, ويوم افقر من التايب من السياف وسيوفه
ويوم اغسل يدي بالنور ويوم اغسل يدي بغبار ,,,, ويوم اصير انا الزاهد وانا المفتون في نوفه
دريتي ليه يا نجوى رفضت الشوق لو هو حار ,,,, لان مثلي متى قيد يموت وينتحر شوفه

وسلامتكم
انا بانتظار رد المشرفين الاعزاء ان كنت ساواصل نشر قصائده ام لا

[عكروشــان]

اررررررررررررررررحب

وقصيده جزله وشاااعركبير ويسعدنا انضمااام اى شاااعر اما الشاعر

مانع بن صالح فانه منا وفينا ووجوده بيننا شرف كبير لنا

اشكرك من الأعماااق
على هذه الرائعه واتمنى منك المزززززززززززززززززيد


عكروشاان

[دحباش]

صح لسانك و لسان الشاعر .... و الله لايهينك ياذيب على هذه الرائعه للرائع بدر الحزين

لاأخفيك اني من اشد المعجبين بالشاعر هذا :D

ياليت تكثر من قصايده .

تشاو

[سعيدان]

قصيدة بصمة ابهامي
رضيت او مارضيت القلب بعيونك غدا مرهون "="
من اول يوم قابلتك وعينك هاجس احلامي
تدلل غصب حبيتك تمون او ما تمون... تمون"="
لاني صرت مجنونك وشوقي دافي وحامي
اخبي... شلون وعيونك تسلهم تكسر القانون"="
تركت السيد الجبار لا مبصر ولا عامي
تثنا رمشها وافتر في صدري يسير بهون"="
نزع ظلعين وابدلها طعون وجرحها دامي
ترك جبار في صدري طفل يبكي طفل مغبون"="
يجر الدقه..الونه..يبث الشوق بعظامي
عيونك ليل لا يا احلا عيون الا عيونك كون"="
عيونك عالمي السحري وسحره دوم متنامي
عصف بي طرفها الفتاك واودعني لها مرهون"="
غصبني غصب اظلم الحب وانسى سالف ايامي
كتبني اليوم لعيونك قصيده حرفها مفتون"="
تفضل هاك ذي غصبا لك الله بصمة ابهامي
نعم مجنون بعيونك اذا كان الغرام جنون"="
وانا الملتاع والمغرم وانا المشتاق والظامي

[سعيدان]

قصيدة خوافينا
كفى ظيم الزمن تكفا دخيلك لا تزيد اكثر"="تكفينا هموم ايامن وقسوة ليالينا
ترى مثلك خلقنا الله بشر نحلم بصبح اخضر"=" يجينا نغتسل به او نواسي به ماسينا
ولكن وش نسوي لا غدا فينا العذاب اكبر"=" من احلام العواطف من سفنا من مراسينا
رضينا غصب عنا بالهموم اللي تجي تقهر"="غرسنا بالعذاب الهم لين ادما ماقينا
مواجع ما دعيناها قدر جات وقدر تظهر"=" تسايرنا بكل دروبنا كنها خطاوينا
نعم يا سيدي ما عاد فينا للهوى دفتر"=" طوينا صفحة عيون المها بكتاب ماضينا
الاعيب الهوى والموعد الواقف على معبر"=" وسر الاغنيات الحالمه ما عاد يغرينا
نسينا طيب وردات الخزاما بالعمر لصغر"=" كبرنا او كبر سر المواجع في خوافينا
خوافينا الم وديون مثل ايامنا تكبر"=" وغربه عن اهلنا والديار اللي تنادينا
شسولف والالم كل السوالف والقهر خنجر"=" قتلنا او قتل يا سيدي فينا .. امانينا

[سعيدان]

قصيدة سكة الاحزان
نعم فيني-على قولك جمر هم وجمر اشجان"=" واذا تبغى الجمر كله جميعه مجتمع فيني
ولدت وداخلي شوقي,مسافر للسما ولهان"=" ولدت القيد ما احبه..يكبلني ويطويني
احب اكتب قصيدي مجد..رعشه صاغها الوجدان"=" بنور الشمس لاكتبها لو ان الشمس تكويني
واحب افرح..احب اضحك..احب اعشق.. انا انسان"=" ولكني محب الحب اذا فيه ب تدفنيني
وما دمتي تحبين القيود.. وتعشقي القضبان"="
وما دمتي تحبيها فلا يمكن.. تحبيني
لان طبعي مثل طير تعلا ما يبي سجان"=" تعلق بالسما العالي رفض قيد البساتيني
انا اطباعي غريبه صح يمكن سكتي احزان"=" ولكن الطبع فيني شموخ ما يبكيني
انا ابغى اللي يرافقني يعادل كفة الميزان"=" ويرحل صوت باعماقي يشجعني..ويغريني
يجوز ان المسافه شمس,يجوز الخاتمه حرمان"=" يجوز..ولكن ايماني بوجداني يعزيني
واقول اني-على قولك-جمر هم وجمر اشجان"=" قول ان الجمر كله, جميعه, مجتمع فيني

[سعيدان]

قصيدة عناقيد الحزن
تعب يا صاحبي الدنيا تعب يا صاحبي المشوار"="تعب حتى الاماني متعبه في صفحة كتابي
عجايب وقتنا كله وهم باسم الاماني صار"=" حرمني بسمتي واليوم جرحي لون اثيابي
يعيش الورد او يذبل يطول الصرح او ينهار"="سوالف جرحي الحمرا بعيني تفرض اغيابي
يمر الوقت وش يعني مدام الوقت صار غبار"=" غدا يومي مثل امسي بكفي حفنة ترابي
نعم يا صاحبي مليت جرحي .. دمعي المدرار"=" تعبت اقف بكف الريح واسمع صرخة اهدابي
كبر همي كبر جرحي كبر حزني وصار اشجار"=" عناقيد الحزن منها بقلبي ويل ما غابي
توفى اللون بعيوني وناظرت الزهور احجار"="اشوف ان السما صحرا كأن بعيني احجابي
بوسط الشئ وللاشئ وقفت بخطوتي محتار"="وضاعت وجهتي ضيعت دربي وين محرابي
غريب وغربتي ديره ولكن ما بها سمار"=" بناها وقتي الظالم بشوكه ثم تلوا بي
حزين وحزني اكبر من سما فيها قمر غدار"=" اذا جاالليل ما بدد ظلام الليل..كذابي
سوالف..واه يا دنيا سوالف والجروح اكثار"="
دخيلك يا شفق وين انت خل الكون عنابي

[قايد الشريف]

الله لايهينك على هذا المجهود في كتابة قصايد شاعرنا الرائع مانع بن جلاب وارجوا ان توافينا بجديد ه متى ماسنحت الفرصه فهو بحق يستحق ان نحتفي بقصائده

كما ارجوا ان كان بريده الالكتروني لديك ان تزودنا به لنوجه له الدعوه بالانضمام الى كوكبة المبدعين هنا في هذا المنتدى الجميل وان ماخاب ضني فانت قريب منه


اخوك قايد الشريف

[هادي ال زليق]

الله لايهينك وتسلم يمينك .. وصح لسانك ولسان قايلها..


حقيقه تمنيت لو كانت كل قصيدة بمشاركة منفصله لكن ماقصرت وتسلم


قصائد مانع بن جلاب كالدرر وانا واحد ممن تطربهم قصائده


اضم صوتي لصوت ابو عبود وياليت تتحفنا بقصائد جديدة او توصل ايميله لابو عبود


لك كل الحب والتقدير..

.....

[سعيدان]

الاخ والمشرف العزيز والشاعر الكبير قايد الشريف
اشكرك على ردك اولا
وصراحه اني ما اعرف الشاعر بدر الحزين ولا عمري شفته ولكن عشقي لهذا الشاعر هو الدافع لي الى اللهث خلف جميع قصائده واللتي املك ولله الحمد الكثير منها وسوف انشرها تباعا

الاخ والشاعر العملاق هادي ال زليق
اشكرك ايضا على ردك
وكانت لي وجهة نظر من البدايه وهي ان انشر جميع قصائده هنا في موضوع واحد لكي تكون كالديوان وتكون مرجع لكل من يعشق بدر الحزين

كنت اتمنى طول عمري ان اتعرف على بدر الحزين واتمنى لو يعلم بدر الحزين كم اعشق شعره ...........

مشرفنا الغالي قايد الشريف
جمعتني الصدفه السعيده بك قبل عامين في رحله من الرياض الى نجران وكم كنت على قدر من الاخلاق عجزت ان الاقي مثيله
اتمنى ومن كل قلبي ان ارى بدر الحزين بيننا هنا
انها امنيه والرجاء ممن له معرفه به ان يدل المشرف على عنوانه

[سعيدان]

قصيدة مر الحياة
تبقى الحياة بمرها حلوه ما دام الله كريم"="قم نفض غبار الحزن عن خاطرك لا يخنقه
يخلق مع الضيقه فرج رب على خلقه رحيم"="ويجيب من عقب الما والليل شمس مشرقه
يا صاحبي رغم العنا والضيق والجرح الاليم"="يبقى الامل رغم الالم رغم الجروح المحرقه
قيد القهر لا تاضعه بيدك على قلبك مقيم"="ارم القهر وارم العنا بذر الرجا لا تسحقه
قم هات كفك في يدي نبدأ من الصفر القديم"="من ساعدك في ساعدي حزن المواجع نشنقه
لا خاننا بامس الزمن واليوم بالضيقه زعيم"="بكره نسانيس الامل فيها الفرج نستنشقه
يا صاحبي من ذا الشجر خذ حكمة الصمت الحكيم"="رغم الرياح التطعنه يبقى بهامه شاهقه
عش دنيتك لا تنحني مهما غدا وقت خصيم"="بارادتك تحني القهر بامواج عزمك..تغرقه
لا بد ما ياتي مطر ما دام به نسمه وغيم"="لابد ما ياتي فجر رغم الليالي الخانقه
هيا نحاول للامل نوصل اذا نوصل سليم"="ولا..فياكم غيرنا لفت حبال المشنقه




هذه القصيده تكفي لنقول ان بدر الحزين هو الشاعر الاول.. امس..و اليوم.. وغدا

[دحباش]

الله لايهينك .. ياأخ سعيدان على المجهود الرايع ... و اذا كان عندك الكثير من قصايد مانع جلاب .. مكتوبه .. تقدر تحطها في موقع مجاني له .. تحط فيه قصايده للاطلاع . و اذا تبا مساعده في ذا الشي انا مستعد.

تحياتي لك :)

[صالح بن سالم الحيدر]

الاخ \سعيدان

الشاعر الكبير\مانع ال جلاب

(بدر الحزين)

شاعر يسافر بنا الى حدود الوله والشوق...........وهو رائع في كتاباته

..اشكرك على هذا الاختيار المميز ........ونتمنى انضمامه الى هذا المنتدى الرائع


اشكرك ثاني على اختيارك ....


اخوك \صالح ال حيدر

[سعيدان]

الاخ صالح الله لا يهينك ومشكور
واختياري لبدر الحزين شرف لي لان الشاعر الكبير بدر الحزين يعتبر من اول من ابدع في مجال القصيده الحديثه من نجران
وعلى العموم انا املك رصيد جيد من بنك القصائد الجميله للشاعر ولكن انتظر قليلا فربما هناك ما هو اجمل

اشكرك على الرد مرة اخرى كما يسعدني ان ارحب بك في منتدى الشامل

[سعيدان]

اولا الله يحييك معنا في المنتدى
ثانيا حبيت اوضح اني ما اعلم اي شئ عن الديوان ولا عمري شفته
والقصايد اللي نشرتها مجمعها من عدة جرايد ومجلات نشرها الشاعر بنفسه
ولا اعتقد ان الشاعر سوف ينشر قصائد في مجلات وجرائد وهو لا يريد لها الانتشار